বন্ধবোৰ কেবল গৰীবৰ বিৰুদ্ধে আন একো নহয়:
____________________________________
এটা দুটা তিনিটা চাৰিটা
হিচাপ কৰি কৰি শেষ হৈ যায়
আঙুলিৰ গাঁঠি
কিন্তু শেষ নহয়
দুখীয়াৰ দুখ
আৰু শেষ নহয় বিজতৰীয়া
বন্ধ সংস্কৃতি,
হে মহান নেতাসকল
কেতিয়া বুজিবা
বন্ধ মানে অনাহাৰ
বন্ধ মানে পেটত গামোচা
আৰু কাৰোবাৰ বাবে
মাথো মতলবী আখৰা,
তোমালোকে খুলি দিয়া চকাবোৰত
পাম মাৰোতে মাৰোতে
এতিয়া মোৰো হাত দুখন টান হৈ পৰিছে
ছিঙিব পৰাকে বন্দীত্বৰ শিকলি,
ফটা চেণ্ডেলত মঁৰাপাতৰ ফিটা
তথাপিও মহতিয়াই যাওঁ
অগ্নিকনা হৈ
তথাকথিত প্রতিবাদী ৰাষ্টা
য’ত থাকে মাথো
পোৰা টায়াৰৰ গোন্ধ
নাথাকে সাহস, আজুঁৰি অনাৰ
গৰীবৰ বাবে
সঁচা স্বাধীনতা।
No comments:
Post a Comment